Batang Injil - Tusun 1 - Allah Taala Endang Bisi

Allah Taala Endang Bisi

Kadang-kadang urang selalu nanya diri empu: Bisi ke Tuhan? Enti bisi, bakani meh gamal Iya? Bakani aku ulih ngelala Iya deh?
Maioh amai pekara ke nunjuk ke kitai ianya Allah Taala tu endang bisi

Lebuh kitai meda semua utai ke badas-badas ba perua' (bumi) tu, kitai nemu semua utai tu udah digaga urang ke pemadu pintar. Lebuh kitai meda pemanah dunya tu, kitai nemu dunya tu udah digaga olih jari urang ke landik serta bepenemu. Maia malam hari, lebuh kitai nengkadah ke langit, lalu meda bintang, serta mega meda bintang ngayap ke empelesit ba langit din, kitai nemu semua utai tu digaga serta dikuasa ulih sikko urang ke pemadu bekuasa. Tuhan udah ngaga semua utai tu.

Bisi sekeda mensia ke lurus ati, udah meda serta bejako enggau Allah Taala. Sida madah ke kitai pendiau Allah Taala, lalu Iya mega deka ke semua kitai ngelala Iya, serta nitih ke jako Iya. Bala sida ke lurus ati tu, udah nulis bub tauka kitab-kitab tuchi, awak ke kitai ulih belajar pasal Allah Taala.

Tiap iko kitai ulih mereti, lalu nemu Allah Taala tu sigi idup, lalu Iya sigi bisi. Iya deka mantu kitai awak ke lebih nemu enggau dalam agi pasal Iya ke endang bisi, lalu Iya deka meri kitai pengingin ati, awak ke kitai ulih ngelala Iya enggau semak agi.

Jako Tanya Ngagai kita:
Nama sedeka utai ke nunjuk ke kitai ianya Allah Taala tu bisi?

Allah Taala siko urang ti sempurna
Urang tuchi ti udah kala meda Allah Taal bisi nyebut, gamal Iya sama sebaka enggau kitai mensia. Tubuh Iya perencing. Pemurak enggau pemadas gamal Iya, lebih agi mulia, nadai ulih dibanding ke kitai.

Iya ukai patung tauka utai idup ke bukai. Iya ukai mega Roh. Iya bisi tubuh ti betulang serta bisi isi. Langkar tubuh iya baka kitai mensia tang  bisi penyelai. Tubuh Iya nadai ulih mati. Tubuh Iya nadai ulih pedis tauka kena penyakit.

Allah Taala ulih meda serta ninga kitai. Iya ulih berandau enggau kitai, lalu kitai mega ulih berandau enggau Iya.

Allah Taala ngaga matahari, bulan, enggau bintang.

Iya bisi pengasal ati. Iya ulih ngasai ke pengerindu tauka penyinu. Iya kasih ke semua kitai, lalu Iya deka ke semua kitai lantang pendiau. Iya mega enda beciping ati serta nelap enggau kitai. Iya ngaga pengawa ke manah lalu bejako pasal utai ke amai aja. Iya nemu semua utai. Iya mega ulih ngerja maioh macam pekara.

Kitai patut nyembah Allah Taala aja. Iya idup ba siti tempat kumbai kitai Syurga. Tempat tu jauh lebih badas ari perua' tu.

Jako Tanya Ngagai kita:

Bakani gaya Allah Taala?

Bakani Iya bebeda ari kitai?

Allah Taala Mantai ke Pengasih-sayau Iya ngagai kitai ngena maioh macam chara.

Allah Taala ngena kuasa Iya nulung kitai. Iya ngaga langit enggau dunya alai kitai diau tu. Iya ngaga matahari, bulan enggau bintang. Iya mega ngaga semua utai tumbuh enggau jelu ba dunya tu. Iya ngaga kitai sama sebaka enggau gamal Iya. Iya ngaga semua utai ba dunya tu laban iya sayau ke kitai. Iya deka nulung kitai mensia ngerja pengawa manah lalu diau lantang ba pengidup kitai tu.

Allah Taala ngena pengelandik Iya dikena mantu kitai. Iya nemu sebarang utai ke udah nyadi. Iya mega nemu nama utai ke benung nyadi. Lalu Iya mega nemu nama utai ti deka nyadi. Iya ulih macha nama utai ba runding kitai. Laban Iya nemu semua utai, Iya nemu nama utai ti patut ditulung Iya ngagai kitai, ngambika kitai bulih pengidup ke lantang. Iya nemu, enti kitai deka bulih pengelantang, kitai patut ngembuan ulah badas. Iya deka mantu kitai nyadi manah laban Iya sayau ke kitai.

Jako Tanya Ngagai kita:

Bakani Allah Taala mantai ke kasih-sayau Iya ngagai kitai?

Allah Taala deka semua kitai ngelala Iya

Laban Allah Taala amai sayau ke kitai, Iya udah meri nyawa Iya ngagai kitai serta mega meri bumi ti badas tu nyadi tempat alai kitai diau. Iya deka ke semua kitai ngelala serta mereti ke pengawa ke patut dikerja kitai. Iya udah besemaia, kitai deka ngelala Iya.

Tusun pengawa ke tau mantu kitai ngelala Allah Taala enggau dalam agi:

1. Kitai ulih merati ke dunya ti udah digaga Allah Taala lalu meri terima kasih ngagai Iya.
2. Kitai ulih pecaya, Allah Taala endang bisi, lalu Iya kasih ke kitai.
3. Kitai ulih macha kitab ke ditulis urang tuchi pasal Allah Taala.
4. Kitai ulih belajar serta ngerja pengawa ke disuruh Allah Taala gaga serta dipelajar ke kitai.
5. Kitai ulih bejako enggau Allah Taala, lalu minta bantu Iya, awakka Iya ulih nulung kitai ngelala Iya.

Penemu kitai pasal Allah Taala ulih mantu kitai mereti agi ke pengidup kitai tu. Enti kitai ngelala Allah Taala, dia kitai deka nemu Iya ulih mantu kitai nyadi urang badas serta diau dalam pengelikun. Kitai mega nemu Iya badas amai ngagai kitai, lalu Iya enda deka ngelak ke pekara ke jai nuntung kitai. Kitai ulih belajar ke semua pekara ti endang disuruh Iya pelajar kitai. Kitai ulih belajar bakani chara kitai minta bantu ari Iya. Kitai ulih nyadi mensia ke badas serta bisi pengaga ati ba pengidup tu.

Jako Tanya Ngaga kita:

Nama utai ke patut dikerja kitai ngambika ulih ngelala Allah Taala?

Nama pemanah ti diasai ke kitai enti kitai ngelala Allah Taala?

Injil ke tau dikena ba ajar tu:

Maioh amai pekara ke nunjuk ke kitai ianya Allah Taala tu endang bisi
Kereja Rasul 7:55-56 (Siko nabi udah meda Allah)

Allah Taala Siko Urang ti Sempurna
Pemungkal 1:26-27 (Mensia digaga sama sebaka enggau gamal Allah Taala

Allah Taala Mantai ke Kasih-sayau Iya Ngagai Kitai ngena maioh Macam Chara
Pemungkal 1:1-25 (Allah Taala ngaga langint enggau bumi, enggau maioh utai ke dalam nya.)
Luke 12:6-7 (Allah Taala rindu ke semua utai ke digaga Iya.) 

Allah Taala Deka Kitai Ngelala Iya
Ulang Adat 4:29 (Sida ke nguji deka ngelala Allah Taala, deka ngelala Iya.)
John 17:3 (Kitai ulih ngelala Allah Taala.)
1 John 2:3 (Enti kitai ngasi ke Allah Taala, kitai ulih ngelala Iya.)
Mosia 4:9 (Kitai patut pecaya ke Allah Taala.)

Penyalin tu enda diasoh tauka dikemendar ari Gerija Jesus Kristus Urang Tuchi Dudi Ari. Pengawa ti bendar dalam jaku Inggeris ulih dibacha ditu.
This is not an official or authorized translation from the Church of Jesus Christ of Latter Day Saints. The official work in English can be read here.