Pengidup Ba Syurga
Kala ke enda kitai idup apin kitai ada ke dunya tu? Dini alai kitai diau maia nya? Nama utai ke dikereja kitai maia kitai din?
Tiap Iko Kitai tu Anak Allah Taala
Apin kitai adai ke dunya tu, kitai udah idup ba Syurga din. Endur kitai ba Syurga juah lebih manah ari semua utai ba dunya tu. Kitai begulai diri sebilik ba Syurga din. Kitai bekunsi pengerindu enggau diri sama diri, lalu kitai diau lantang senang. Allah Taala nya Apai kitai. Ari nya, Iya kasih serta ngambi berat ke setiap iko kitai. Ba Syurga din mega kitai bisi Indai.
Tiap iko mensia ba bumi tu sama menyadi kitai ba Syurga din suba. Anak tuai dalam raban kitai sebilik maia ba Syurga din suba ianya Jesus Kristus. Iya meh menyadi tuai kitai.
Maia kitai ba Syurga, kitai nadai ngembuan tubuh ti bisi isi enggau tulang baka ke diatu. Kitai semina idup dalam roh tauka semengat aja. Semengat kitai sama baka langkar tubuh kitai mensia mega. Lebuh kitai agi roh tauka semengat, kitai ulih berandau enggau diri sama diri, mindah kin-kitu, nitih ke peneka ati, serta ngelala utai ke manah enggau utai ke jai.
Semua kitai bisi penyelai ari siko sama siko maia kitai di Syurga din. Kitai bebeda sama baka kitai diatu. Kitai mega bisi pengingin ati serta bisi pengelandik ke enda sebaka. Kitai mega ngena pengelandik nya enggau cara ke bebeda-beda.
Jako Tanya Ngagai kita:
Bakani gaya tempat Syurga alai kitai diau suba?
Sapa menyadi tuai kitai?
Apai Kitai di Syurga nemu kitai ulih nyadi baka Iya
Laban Allah Taala sigi Apai kitai, Iya ngelala tiap iko kitai ke anak Iya. Iya rindu serta sayau ke kitai. Iya mega nemu kitai udah nerima pengelandik ti diberi Iya, dikena kitai belajar ke semua penemu ti dikemisi' Iya, awak ulih nyadi baka Iya. Iya deka ke semua kitai badas baka Iya. Iya mega deka nulung kitai ngangkat ke penemu kitai ngambika ulih nyadi baka Iya.
Jako Tanya Ngagai kita:
Kati ulih kitai belajar semua penemu ti dikemisi' ke Apai kitai di Syurga lalu nyadi baka Iya?
Nama asai ati nuan lebuh nuan nemu Allah Taala tu Apai kitai di Syurga?
Kitai semua udah begulai idup sama ba syurga.
Apai Kitai di Syurga udah ngaga siti Perambu dikena Mantu Kitai
Maia kitai di syurga suba, kitai belajar maioh macam pekara serta ngerembai ke pengelandik diri enggau naka ke ulih kitai; tang taja bakanya maioh ga' pekara bukai ti enda ulih dipelajar serta dikereja kitai maia nya suba. Apai ba Syurga ngaga siti perambu ngambika kitai ulih ngerembai ke pengelandik kitai.
Apai di Syurga lalu ngangau ke semua kitai lalu mai kitai baum ba Syurga din. Semua kitai datai magang. Iya nerang ke perambu Iya dikena mantu kitai belajar, lalu Iya madah ke kitai, enti kitai nitih ke perambu Iya, kitai deka nyadi baka Iya.
Apai di Syurga deka ngaga siti tempat tauka bumi alai kitai ulih diau sementara. Maia kitai di bumi, kitai enda ingat ke pengidup kitai ke begulai enggau Apai di Syurga suba. Kitai ulih milih utai ke manah tauka jai. Tu meh siti ari penguji dikena kitai mantai ke diri sekalika deka nitih ke Allah Taala maia kitai enda begulai enggau Iya agi.
Nitih ke perambu Iya, kitai deka nerima tubuh ke bisi isi enggau tulang tu. Kitai beguna ke tubuh baka tu awak ke kita ulih belajar semua penemu ti bisi dikembuan Allah Taala lalu ulih ngereja pengawa ti dikereja Iya. Lebuh tempuh udah datai ila, kitai deka mati lalu roh kitai deka ninggal ke tubuh tu. Udah nya, roh kitai deka begulai baru enggau tubuh kitai, lalu kitai nadai deka mati agi. Barang sapa ke udah ngereja pengawa ke disuruh Iya gaga', deka pulai idup baru enggau Iya dalam pengidup ke meruan belama-lama ia.
Kitai mega udah belajar ianya tiap iko kitai deka besatup enggau penanggul ba dunya tu, baka penyakit, pemerinsa, pemedis serta pemati. Taja bakanya, kitai nemu kitai belajar ari semua pengalaman ba pengidup tu. Penanggul ke ditempuh kitai tu ulih ngajar kitai reti pengidup serta ulih mai pengerindu. Penanggul mega ulih mantu kitai ngambika ulih nulung diri sama diri ba pengidup ba dunya tu.
Apai di Syurga deka milih siti hari enggau tempat ba dunya tu alai kitai diada ka. Iya ngelala segenap tempat ba dunya tu, lalu Iya nganjung kitai ka ngambika ke kitai ulih belajar ke semua utai ke patut ditemu kitai. Kitai semua deka bisi peluang ngereja maioh macam pekara. Iya deka ke kitai ngereja utai ke manah, lalu pulai ngagai Iya baru. Taja bakanya, Iya enda mansal kitai ngereja pengawa tang nitih ke peneka ati kitai.
Sekeda kitai deka milih lalu ngasi ke Iya. Enti kitai ngasi ke Iya, kitai uilh nyadi sesemak agi baka Iya lalu ulih idup begulai enggau Iya baru. Bisi sekeda enggai ngasi ke Iya lalu sida tu enda pulai idup baru enggau Iya.
Lebuh kitai udah ninga perambu Iya nya, kitai berasai gaga ati. Kitai deka belajar serta ngerembai ke penemu kitai ke udah bisi nya. Nya alai, tiap iko kitai ke ba bumi tu udah besetuju deka idup nitih ke perambu Apai kitai di Syurga.
Jako Tanya Ngagai kita:
Nama perambu Apai kitai di Syurga ke semua kita?
Nama kebuah kitai mesti ninggal ke Syurga?
Nama ke disuruh Apai kitai di Syurga gaga' kitai ba bumi tu?
Injil ke tau dikena ba ajar tu:
Tiap Iko Kitai Tu Anak Allah Taala
Luke 24:39 (Roh nadai tubuh ti digaga ari daging enggau tulang.)
Hebrew 12:9 (Allah Taala nya Apai ngagai roh tau semengat kitai.)
Apai Kitai di Syurga Nemu Kitai Ulih Nyadi Baka Iya
Matthew 5:48 (Jesus udah ngansak kitai awak ke nyadi sama sebaka enggau Apai kitai di Syurga.)
3 Nefi 12:48 (Jesus udah ngasank kitai ngambika kitai ulih sempurna baka iya, lalu sama sebaka enggau Apai di Syurga mega.)
3 Nefi 27:27 (Kitai patut nitih ke chuntoh Jesus Kristus, lalu nyadi sama sebaka enggau Iya.)
Apai Kitai Di Syurga Udah Ngaga Siti Perambu Dikena Mantu Kitai
John 14:2-3 (Allah Taala udah besemaia deka meri kitai chara bakani ulih pulai ngagai Iya.)
Kereja Rasul 17:24-31 (Allah Taala nganjung kitai ngagai sekeda endur ba bumi tu nitih ke masa ti udah ditentu ke Iya ba perambu Iya nya.)
1 Nefi 17:36 (Bumi tu digaga' awak ka bala anak Apai di Syurga ulih diau dia.)
2 Nefi 9:13 (Allah Taala ngaga siti perambu dikena nulung kitai.)
Alma 34:9 (Perambu ke diberi Allah Taala ke kitai nya madah ke chara bakani kitai ulih pulai baru ngagai Iya.)
Alma 42 (Allah Taala bisi siti perambu ngagai kitai.)
No comments:
Post a Comment