1 Nefi 2

Pasal 2

Lehi ngambik sebilik ke dalam endur puang semak Tasik Mirah - sida ninggalka barang sida - Lehi nyerahka korban ngagai Tuhan lalu ngajar anak iya dikena ngasi pesan - Laman enggau Lemuel merungut enggau apai sida - Nefi patuh lalu besampit enggau pengarap; Tuhan nusi ngagai iya, lalu iya dipilih dikena merintah atas menyadi iya. Kira-ira 600 S.K.

Peda meh, nya nyadi meh Tuhan nusi ngagai apai aku, au, sama belak dalam mimpi; lalu madah ngagai iya: Diberkatka nuan Lehi, ketegal utai ti udah digaga nuan; lalu ketegal nuan udah tat lalu madahka utai ti aku mesanka nuan ngagai urang tu, nya alai, sida ngiga ngambik pengidup nuan.

2 Lalu nya nyadi meh Tuhan mesanka apai aku, sama belak dalam mimpi, iya patut mai sebilik iya enggau mupok ke endur puang.

3 Lalu nya nyadi meh iya ngasi jaku Tuhan, peda meh iya ngaga baka Tuhan udah dipesanka iya.

4 Lalu nya nyadi meh iya mupok ke dalam endur puang. Lalu iya ninggalka rumah iya, enggau tanah pemai iya, enggau emas iya, enggau pirak iya, enggau utai ti berega, lalu nadai mai nama nama enggau iya, kelimpah sebilik iya, enggau bekal, enggau langkau kain, lalu iya mupok ke dalam endur puang.

5 Lalu iya nurun ke tepi semak tebing Tasik Mirah, lalu iya mupok ke dalam endur puang ti dalam tebing lebih semak Tasik Mirah; lalu iya mupok ke dalam endur puang enggau sebilik iya, ti ditampong selaka indai aku, Saria, enggau menyadi ku, ti benama Laman, Lemuel, enggau Sam.

6 Lalu nya nyadi meh lebuh iya bejalai be endur puang maia tiga ari, iya nirika langkau kain ba lembang semak tepi sungai berai.

7 Lalu nya nyadi meh iya nirika siti pandung batu, lalu meri sedekah ngagai Allah Taala; lalu meri terima kasih ngagai Tuhan Allah Taala.

8 Lalu nya nyadi meh iya namaka sungai nya, Lama, lalu iya labuh ke dalam Tasik Mirah; lalu lembang nya dalam pinggir tebing tasik din.

9  Lalu lebuh apai aku meda ai nya labuh ke dalam mata ai Tasik Mirah; iya madah ngagai Laman, ko iya: O enti nuan ulih nyadi baka sungai tu, semampai labuh ke dalam ai engkeching semoa pengelurus.

10 Lalu iya mega bejaku ngagai Lemuel: O enti nuan ulih nyadi baka lembang tu, kering sereta tegap; serta enda ulih berubah dalam ngasi pesan Tuhan!

11 Diatu iya bejaku tu ketegal pengeras Laman enggau Lemuel, nya alai sida merungut dalam maioh utai enggau apai sida, laban iya siko ti nilitka utai ti ka nyadi, lalu iya udah ngiring sida ari tanah Yerusalem, ninggalka tanah pemai sida, enggau emas sida, enggau pirak sida, enggau utai berega sida, dikena midang ba endur puang lalu tu seduai madahka iya udah ngaga ketegal peragam ati ti palui.

12 Pia Laman enggau Lemuel, ti tuai, merungut enggau apai sida. Lalu sida merungut laban sida enda nemu pengawa Tuhan ti udah chipta sida.

13 Enda mega seduai pechaya Yerusalem, menoa besai nya, ulih dirusak nundakka jaku nabi, lalu seduai baka urang Yahudi ti diau ba Yersualem, ti nguji ngambik pengidup apai aku.

14 Lalu nya nyadi meh apai aku nusi ngagai seduai ba lembang Lemuel, enggau kuasa, dipenuh enggau Roh, sampai langkar badan seduai digetar di moa iya. Lalu iya ngalitka seduai, singga enda berani jaku ngelaban iya; peda meh, seduai ngaga baka iya mesanka seduai.

15 Lalu apai aku diau ba langkau kain.

16 Lalu nyadi meh aku, Nefi, mudah amat, tang bebadan besai enggau peneka besai mega, dikena nemu utai ke dalam Allah Taala empu, nya alai, aku nyerarat ngagai Allah Taala, lalu peda meh iya nemuai aku, lalu ngelembuka ati ku ngambik ke aku udah pechaya semua jaku ti dipadah apai ku, nya alai, aku enda ngelaban iya baka menyadi aku.

17 Lalu aku nusi ngagai Sam, meri iya nemu utai ti Tuhan udah mantaika aku ulih Roh Kudus iya. Lalu nyadi meh iya pechaya semua jaku aku.

18 Tang peda meh, Laman enggau Lemuel enggai ninga jaku aku; berasai balat ketegal pengering ati seduai, aku nyerarat ngagai Allah Taala dikena seduai.

19 Lalu nyadi meh Tuhan madah ngagai aku; ko iya: Diberekat meh nuan, Nefi, laban pengarap nuan, laban nuan udah ngiga aku enggau regas, enggau pemaruh ati.

20 Lalu semaioh nuan deka ngasika pesan asku, nuan deka belembung, lalu deka diiring ke menoa disemaia, au, sama belak siti menoa ti aku udah nyediaka dikena nuan; au, menoa ti tepilih ari semoa menoa bukai.

21 Lalu semaioh menyadi nuan deka ngelaban nuan, sida deka diburuk ari pemisi Tuhan.

22 Lalu semaioh nuan deka ngasika pesan aku, nuan deka nyadi siko pemerintah enggau pengajar atas menyadi nuan.

23 Peda meh, dalam sari nya, seduai deka ngelaban aku, aku deka nyumpahka seduai enggau sumpah ti balat, lalu seduai deka nadai kuasa atas penurun nuan kelimpah sida ngelaban aku mega.

24 Lalu enti sida pan ngelaban aku, sida deka nyadi penyakit balat ngagai penurun nuan, dikena ngachau sida ke dalam jalai pengingat.